By Qi Fon Siin, Teacher of Yuying Elementary School, Longteng Branch, Mioali County, Taiwan
「自家曉講，毋當倈仔曉講。」當歡喜做得同倈仔—𠊎兩子爺共下企在臺頂高領獎，雖然，上臺領過當多獎，毋過，該央時心肚个樂暢，永久都毋會添放忒。今下，做阿爸儕愛分細人仔零用錢，毋係麼个難事，毋過，愛傳一句客話，在倈仔个嘴項講出來，嗄係𠊎這做阿爸儕十過年來个想望。當歡喜，𠊎聽著了，𠊎做著了！
跈等時光个窿轉到1996年个熱天，在臺南讀大學个𠊎轉到苗栗避暑，在阿姆个鼓勵下報名參加了在明德水庫由客家雜誌社辦个「第七屆客家文化夏令營」，三日兩夜个營隊在吾心肚點了一粒客家个仁，慢慢仔爆芽、綻筍。還記得新娘上花轎—頭一擺在臺頂高講客个激動，在晚會項唱「客家本色」个感動，也係在該央時開始親近客家，講轉客話。在臺南長長个街路項一間間个唱片行問：有賣「𠊎教你唱山歌」个CD無？暑假跈等林生祥个觀子音樂坑「過庄尋尞」，在苗栗埤塘下恩祖公个廟坪項，聽阿淘哥唱「頭擺个事情」，這係𠊎大學畢業該年个青春記事。
人講：「敢去一擔樵，毋敢去屋下愁。」2000年做兵轉來，帶等一股熱情，開始在小學做先生，堵好九年一貫課程實施，去上小朋友一禮拜有一節个客語課，教學相長，自家在課堂肚一隻字一隻字帶等學生仔讀，一句話一句話渡等學生仔講，拈轉久無講个客話。
「客語認證」也係𠊎兜大人細子努力个目標，從基礎級到初級、中高級、高級，在這數位時代，𠊎也運用了「生生有平板」个硬體優勢，做了當多个互動軟體，分學生仔來挑戰，就在搞遊戲个過程中，佢兜曉得聽客、講客、讀客、寫客。
「哈客網路學院」係大家个好朋友，頂高有各式各樣个課程、資源，做得收看、下載運用。經過恁多年在教學實務累積个能量，舊年過年拜阿公婆个時節，同佢兜報告蝨嫲通過了客語能力高級認證，係自家試著沙鼻个事情。
這下在臺灣有70隻客家文化重點發展區，客話係主要通行語，為著愛營造客語友善環境，𠊎也去參加口譯人才个培訓，得著進階認證，希望探一板橋，分大家都歡喜講客、輕鬆聽客。跈等AI技術个應用，語音辨識、語音合成，這下毋管在哪位，客話都做得千里一線牽，連傳LINE都做得用客家字。「話係風，筆係蹤」，𢯭手做客語社區个營造，在庄頭肚建置客語景觀，分客話隨時都在邊脣出現，也係一件生趣个事情。
時間過來真遽，還記得，倈仔在厥阿姆肚笥肚个時節，𠊎就開始對等佢講客，喊佢莫手擎腳蹬，分阿姆擐人擐到恁辛苦。出世以後，用客同佢講繪本，放尞日，去遶尞客庄；陪佢去參加「幼幼客語闖通關」；帶佢在客家藝文競賽勇敢上台講客。這下高二个佢，既經來到夏令營做小志工，渡等細老弟、細老妹共下來講客。也在班項擎頭旗，帶等同學共下參加客語讀者劇場、客語對話比賽，展現新世代个活力。
學校、家庭、社區—吾个客話傳承路，豐富了生活，也分生命个風景還較靚！
Chinese 
English